Kerbred 1990
 
Hey, Ehr frisch geduschde, fönfrisierte, rausgebutzte Zimmner Leit!
Wer jetzt noch nit seu Gass' gekaeiert
un nit emol die Kerbred hejert,
sou en Zimmner dud mer leid!
Mer freje nit, hey du, wie hasde,
mer grüße Ou und Zugerasde.
Hallo Fans, vun fern un no
es is souweit, die Kerb is do.
 
Zimmner Kerb is do
 
Des Grüße gejt immer noch weirer,
mer grüße ach die Gastarweiter.
Die Grieche, Türke, wie se sinn,
die Vädder, Müdder un die Kinn,
die DDR ler aus der Zone.
Mer frahn uns, daß se bei uns wohne.
's is nejens wie in unserm Ort,
Zimmner Wasser nie mej fort!
 
Ehr Zimmner, hejert emol her,
jetzt stelle mer uns mol fehr:
Isch, Kerbvadder, wie seh ich aus?
Isch kumme aus de Woldschtroß draus.
Isch hoffe, ehr erkennt mich wieder,
Soh' vun de Judith un ein Bernhard's Dieter.
Herre se misch Holger nit genennt,
hätt' isch misch selwer nit gekennt.
Die Tanja, reizend ouzuseje,
die Firstlady vum Kerbgescheje,
gehejert, sischer wißt ehr des,
de Doris un dem Reinhold Kress.
Mer sinn e Pärsche ohne Tadel,
beide echde Zimmner Adel.
Mundschenk is de Holger Reitz,
den kennt ehr ja bereits.
„Du Tanja, du dem Johrgong winke,
die derfe jetzt mol uff uns drinke."
 
Prost, prost Kamerad
 
Könischsangle is e Fest
un gewinne dud de Best.
Mojens frieh werd lousgezohe,
jeder Fang werd uffgewoe.
Hebt ehr vun Ongler schun gehäjert,
wie en Fusch de Dieter hott veräjert?
E Forelle, unscheniert,
hott den Vorsitzende blamiert.
Suo e Forelle wiegt nit wenisch,
er fühlt sich schun als Ongelkönisch.
De Fusch, e bisje vorgeritscht,
is dem Dieter aus de Henn geglitscht.
Mit letzter Kraft stellt er soi Flosse
un is ins Wasser neugeschosse.
De Dieter im Gesischt gonz bloo,
werfd de Rest vum Fang glei hinerno!
Die Forelle lacht nit wenisch,
was leid dere don om Ongelkönisch.
 
Wenn das Wasser vom Rhein gold'ner Wein wär'
 
Sin emol doj Fenster flegisch,
sin gewiss a doj Vorhäng dregisch.
Wie die Weibsleid nu mol sin,
schtobbe se se in die Weschmaschin.
Grod wie soll Fraa se enne dud
batsch, bauff, wor die Maschin kabutt!
Glei is de Geschäftsmonn kumme,
hott des Monster mitgenumme.
Un die Fraa rift noch mol ou,
„Soue Se, wos is donn drou?"
„Sie hejen's jo om laure Krache,
's lohnt sich nit, des Ding zu mache.
Die dud im Läwe nit mej laafe !"
Er wollt ja nor e nej verkaafe.
Herrje, denkt se schperer, in dem Ding
sin jo noch moi Vorhäng drin!
Die Fraa, die is schun fast om groine,
rennt schnell hinnere uff die Beune.
Doch die Maschin, die wor schun ford
beim Oldworenhänneler om Ort.
Do draus im Schrott erimmgesucht
un zwischedorsch emol geflucht,
un sisch a noch die Henn' verschunne,
Maschin un Vorhäng worn verschwunne!
Passiert eisch emol des Malör,
macht erscht ejer Drummel leer.
 
Un die Zimmner Kerb, sie läwe ...
Un es Kerbmädche, es läwe...
Un de Johrgang 70/1, er läwe...
 
Wonn sisch demnächst de Johrgong trifft,
säigt Paul, do kriggt ehr wos geschtifft.
Isch verschpresch's, 's werd nit vergesse,
mer mache e Spouferkelesse!
Es is de Johrgong 5 36
no ja, die treffe sisch rescht fleisisch.
Es kost' die jo ko Merkelsche,
sie wadde nor uffs Ferkelsche.
Des Seische is gonz ougezwunge
noch in soim Stall erimgesprunge.
Jetzt sagt mol, wos mer do vou holt,
's wor vorn onnern Doog bestellt!
Mer merkt doch, dos die älder wern,
do konn mer sisch um en Doog errn.
Ausgemocht werd unnerdesse:
Schützehaus zum Hähnschenesse!
Hähnschen gewäsche un gefüllt,
wem bei ein Dibener Bäcker foj gegrillt.
Un wirre wadde se uffs Esse.
Sin donn die Giggel a vergesse?
Wer kennt sisch donn in Zimmern aus?
Gewatt werd im Olympia Schützehaus.
De Becker fährt, natürlich schnell
die Hähnschen raus, om Wold, zum Tell.
Kon Mensch zu seje, nirgendwo
's wor nid emol en Abbel do.
De Becker, der hod nit gelacht.
„Auf", sejgt der, „hom mit unsner Fracht!"
En schpajre Ouruf, wie mer hert,
der hod donn alles uffgeklärt.
 
Halb zeije wor es unnerdesse, don wor des grouße Hähnschenesse. De Becker durrene wos husde, kätsche Hähnschen ohne Kruste. Die orme Giggel, Stück ver Stück, zwaamol Diborsch un zurück.
 
Zimmner Hymne
 
Politiker an wie de onner,
die sinn doch stennisch onenonner.
E Geschpräch konn mer verdiefe
doch wos solle Leserbriefe? Die Tornhall stajt, ko Geld is do,
vum Lond nit, nit vun de Gemoa.
Wie kriggt mer frisch, fromm fröhlisch, frei,
des noch gebrauchde Geld ebei?
Isch mach mer werglisch moi Gedonge,
mer hawwe in Zimmern sou veel Banke,
vielleicht müßt mer mol e Bank beklaue,
denn wer ko Geld hot, konn nit (baue).
Velleicht is jo doch, des wer es besst,
in de Gemokass noch en Rest.
Kummt eisch endlich, 's wer en Saje,
doch e bisje mol entgaje.
Wer hilft donn nit, jetzt konnt er klatsche,
Freund orrer Feind mol aus de Patsche?
Jetzt fong isch schun ou, oumegge,
jetzt gejts noch in die Weißdornhecke!
Isch waas jo nit wenn isch des wern,
4 Zivis un 4 Heckescheern.
Des kost nit veel un wer vun Nutze,
die könnte doch die Hecke stutze,
un alle Streit ums liewe Geld,
wer endlisch, endlisch aus de Weld.
 
Haut doch alle mit dem Hämmerchen das Sparschwein kaputt!
 
Sache stejn in unserm Blädsche:
Desinteressierter Johrgong sucht unzufriedenes Kerbmädche!
Vun wem a de Artikel stammt,
gibt's donn e Kerbmädcheamt?
Uff die Art e Kerwemädche
finnt mer heijgstens im Sperrmüllblädsche.
Daß sich wer uff Chiffre meld,
bezweifel isch, des kost blous Geld!
Vielleicht meld sisch oa
vielleicht melle sisch zwoa .
Doch glaabt mer's, wos Besseres kimmt nit no!
Behonneld se gut, ob groß ob kloa,
sunst hebbt ehr next Johr wirrer koa.
 
En Metzjer, der uns ser verdraut,
en Silberbräudigam mit Braut,
läd alle Leit mit Renomee,
im Orewold zum Feiern e.
E Busunnernehme is geforn,
fern Fall, daß die besoffe worn.
Un wies en späjrer immer wohler
hot de Busfahrer die Tiroler,
die a zum Fest geloare worn,
in die Umgäwung rim gefohrn.
 
Daß die, vun hie un vun de Ferne
Ourewold un Umgäwung kenne lerne.
Jeder wolld hom, 's wor nix zu mache,
de Bus fährt lous mit 80 Sache.
Oweramschd, Ewerschd, Weiderscht, Kronischstoa,
Messel, Diborsch, Ritz om Boa!
Des wor gonz gut, mohnt ehr? Vun weje,
kon Mensch hot näjens nix gesäje.
De Fahrer hod en Schpaß gemocht
's wor Zabbeduster Rowe Nocht.
Erscht gäje Mojent 's wor noch 3,
do wor de gonze Schpuk vorbei.
De Metzjer um soj Ruh beschisse,
der hod gonzschaj berappe misse.
 
Muß i denn ...
 
Jetzt hämmer alles des glossiert,
wos bei uns iwwers Johr bassiert.
Un wer sisch iwwer uns geejert,
der derf dess, dem werds nit verwejert,
un wer sisch ougegriffe fühle sollde,
dem sou isch, daß mer des nit wollde.
Bedenkt, mer konn nor ebbes mache,
wou a die Onnern driwwer lache.
Iwwer die Kerb is mer betroffe,
wou die Kerbborschde sin besoffe,
wou alle lauthals louskrakele,